Al-Oufok

Site du Mouvement Démocratique Arabe

Accueil > Égypte > <DIV align=left dir=rtl>حوار بين مرشح رئاسي وشخص مهم</DIV>

<DIV align=left dir=rtl>حوار بين مرشح رئاسي وشخص مهم</DIV>

mardi 8 mai 2012, par علاء الاسواني

علاء الاسواني

المرشح الرئاسي : آلو.. صباح الخير يا فندم.
الشخص المهم : أهلا وسهلا.. فينك من زمان ما سمعناش صوتك؟
المرشح : والله يا فندم أنا مشغول في الحملة الانتخابية. كل يوم أزور محافظة وأعمل مؤتمر انتخابي لما الواحد تعب جدا.
المهم : شد حيلك.. ما فيش حاجة بالساهل.
المرشح : أنا تلميذك يا فندم. سيادتك قدوتنا وعلمتنا العطاء بلا حدود.
المهم : أنت عاوز حاجة؟
المرشح : أبدا يا فندم ربنا يخليك. أنا قلت أتصل عشان أهنئء سيادتك على عملية العباسية. الحقيقة كانت روعة. سيادتك أعطيت درس مهم للعيال المخربين.
المهم : الحمد لله ربنا وفق. العملية كانت منظمة ومدروسة بعناية. الحقيقة ضباط أمن الدولة عملوا شغل عظيم.
المرشح : ضباط أمن الدولة رجال وطنيين وعارفين شغلهم تمام. لا يمكن نستغني عنهم أبدا. الاحتفاظ بجهاز أمن الدولة كان قرارا حكيما جدا.
المهم : طبعا. لو كنا سمعنا كلام العيال بتوع التحرير وألغينا أمن الدولة كان زماننا دلوقت في حيص بيص. لا يمكن لأي سلطة في مصر تستغني عن ضباط أمن الدولة. هم الوحيدين اللي يقدروا يضبطوا البلد.
المرشح : أجمل حاجة في عملية العباسية ان اللي أدبوا المخربين لا جيش ولا شرطة. دول مصريين عاديين تعبوا من الفوضى، قاموا نزلوا وضربوا المعتصمين وموتوهم من الضرب. فعلا مواطنين شرفاء.
المهم (يضحك) : هم صحيح مواطنين شرفاء لكن أخذوا فلوس كثير.
المرشح : وماله يا فندم مش خسارة فيهم. النهارده لما العيال المخربين يعرفوا ان ما حدش حيسيبهم يعتصموا ويتظاهروا بعد كده .البلد تستقر وتهدا وعجلة الانتاج تدور. مش معقول كل قرار تأخذه الدولة يعترضوا ويتظاهروا.
المهم : الكلام ده كان زمان وجبر. من هنا ورايح أي حد ناوي يعمل مشاكل هنتعامل معه بكل حزم.. حتى أهالي المحبوسين راحوا عند القضاء العسكري، وأول ما بدأوا يهتفوا طلعت عليهم الشرطة العسكرية وضربتهم علقة سخنة وعلمتهم الأدب.
المرشح : ربنا يبارك فيك يا فندم. سيادتك عارف والله أنا ساعات أقول لو كنا اتعاملنا بحزم مع العيال دي من الأول. كان زمان سيادة الرئيس مبارك معزز مكرم.
المهم : الحق على العادلي وزير الداخلية. هو أساء تقدير الموقف. في النهاية كل شيء نصيب.
المرشح : أنا صعبان علي الرئيس مبارك. سيادتك عارف النهارده عيد ميلاده.
المهم : عارف طبعا وكلمته عيّدت عليه. ربنا معه.
المرشح : دائما أصيل يا فندم. عندي أكثر من موضوع مهم عاوز أكلم سيادتك فيهم.
المهم خير؟
المرشح : انت عارف سيادتك الشباب عندي في الحملة قاعدين طول النهار على النت بيتابعوا كل حاجة.. فيه على النت فيديو مصور البلطجية اللي ضربوا المتظاهرين وهم نازلين من سيارات الجيش، وفيه واحدة ست طلعت في قناة دريم، وقالت انها شافت بعينها البلطجية وهم بيستلموا سلاح من قسم الوايلي.
المهم : وايه كمان..؟
المرشح : الشيخ حافظ سلامة عمال يقول في كل مكان ان أفراد الشرطة العسكرية اقتحموا مسجد النور بالأحذية وضربوا رصاص وقبضوا على المصلين وعلى البنات في الجامع .
المهم : وبعدين؟
المرشح : أنا قصدي ان أمن الدولة يضغط في الاعلام عشان الحكايات دي ما تعملش تأثير في الرأي العام.
المهم (بانفعال) : طبعا أمن الدولة أعطى تعليمات واضحة للاعلاميين والكتاب الوطنيين اللي بيشتغلوا معه عشان يعملوا تهدئة للناس. لكن في النهاية عاوز أقول لك حاجة : فيديو ولا شهود ولا الشيخ فلان قال ولا عاد.... الكلام ده كان يفرق معنا زمان. دلوقت خلاص. اللي عاوز يصور يصور. احنا كده وبنعمل كده وهنعمل كده كل مرة يحصل فيها شغب. اللي عاوز يعمل مظاهرة بعد كده لازم يفهم انه ممكن يموت في أي لحظة. لو خايف على حياته يقعد جنب أمه وما يعملش فيها راجل. لازم ننظف البلد من العيال المخربين كلهم. النهارده جابولي تصريحات شيخ جليل من مجمع البحوث عارف قال ايه؟
المرشح : قال ايه يا فندم؟
المهم : الشيخ العظيم ده قال ان من حق السلطة في أي بلد مسلم انها تقتل ثلث الشعب من أجل مصلحة الثلثين.. دا رأي الاسلام واحنا الحمد لله مسلمين.
المرشح : ونعم بالله يا فندم.. أهو كده الكلام..
المهم : يبقى سيب اللي عاوز يصور يصور.. احنا صاحيين ومن هنا ورايح أي واحد يعمل شغب حنقصف رقبته..
المرشح : يا فندم أنا فعلا مبهور بسيادتك. سيادتك عندك دائما بصيرة للمستقبل. دائما سيادتك تصحح لي رؤيتي وتنظم لي أفكاري وتوريني أبعاد ما اقدرش اشوفها لوحدي. ربنا يبارك في سيادتك ويخليك لمصر يا فندم.
المهم : عاوز أقول حاجة. مش معنى اننا نأدب العيال المخربين اننا نخالف القانون أبدا.
المرشح : طبعا يا فندم سيادتك علمتنا احترام القانون.
المهم : بالتأكيد. مصر دولة مؤسسات. اللي معه دليل يقدمه للنائب العام وانت عارف هو بيتخذ الاجراءات فورا.
المرشح : طبعا. النائب العام رجل ممتاز.
المهم : الحقيقة النائب العام خبرة قانونية فذة ونادرة.
المرشح : أنا طولت على سيادتك يا فندم؟
المهم : عاوز ايه تاني؟ ما أنا عارفك. طول عمرك تحب اللت والعجن (يضحكان)
المرشح : معلهش يا فندم. يا ما سيادتك استحملتني.
المهم : يا الله يا خويا. قل بسرعة.
المرشح : دلوقت يافندم سيادتك عارف اني توليت مسئوليات صعبة. أنا بذلت كل جهدي زي ما سيادتك علمتني. طبعا الانسان اللي بيشتغل في مصر لازم يكون له أعداء. حزب أعداء النجاح يا فندم. ناس نفوسهم مليانة حقد وغل. يحبوا يشككوا في أي انسان محترم ويتهموه بالباطل.
المهم : كفاية موضوعات انشا. ادخل في الموضوع..
المرشح : سيادتك عارف بعد ما تنحى سيادة الرئيس مبارك، الناس الحاقدين دول قدموا ضدي بلاغات. كلها بلاغات كيدية يا فندم ربنا يعلم. الكلام ده بقى له أكثر من سنة. بعدين فجأة من أسبوع استدعوني للتحقيق. سيادتك يرضيك الكلام ده.
المهم : عاوزني أعمل لك ايه؟
المرشح : يا فندم. أنا خدمت مصر بمنتهى الأمانة ومنتهى النزاهة. يا فندم أنا تعلمت من سيادتك انكار الذات والتضحية في حب مصر. يقوموا آخرتها يحققوا معايا؟
المهم : لما أنت سليم، خايف من التحقيق ليه؟
المرشح : أبدا يا فندم أنا مش خايف. أنا يهمني ان سيادتك تكون راضي عنى. لو سيادتك راضي عنى أروح التحقيق وأنا مطمئن.
المهم : أنا لا يمكن أتدخل في أي تحقيق أبدا.
المرشح : قطع لساني يا فندم قبل ما أطلب من سيادتك تتدخل في التحقيق. أنا تعلمت من سيادتك احترام القانون. أنا كل اللي عاوز أعرفه قبل ما أروح التحقيق. سيادتك راضي عني ولا لأ.. أنا خايف أكون عملت حاجة أغضبت سيادتك من غير ما أقصد.
المهم : يا ساتر عليك. أنت زنان فعلا.
المرشح : أرجوك يا فندم تريحني. سيادتك راضي عني؟
المهم : راضي عنك يا سيدي. استريحت؟
المرشح (يتنهد) : الحمد لله. طالما سيادتك راضي عنى أروح التحقيق وأنا مطمئن.
المهم : خلاص. سيبني أشوف شغلي.
المرشح : يا فندم أنا طمعان في كرم سيادتك. عندي موضوع أخير مهم جدا .
المهم : خليه بعدين.
المرشح : لا يا فندم أرجوك. الموضوع لا يمكن تأجيله.
المهم : قل بسرعة. اخلص.
المرشح : يا فندم أنا تعلمت من سيادتك الديموقراطية واحترام ارادة الشعب. لكن يا فندم البلد بيمر بلحظة دقيقة.. البلد على كف عفريت. الانتخابات الرئاسية قربت واستطلاعات الرأي مقلقة جدا. لازم رئيس مصر يكون شخصية كبيرة عاقلة وحكيمة يعرف يعدي بالبلد الى بر الأمان.. هل يمكن يا فندم اننا نسلم مصر لشخص متطرف زي عبد المنعم ابو الفتوح ولا واحد ناصري زي حمدين صباحي ولا الولد خالد علي الشيوعي. دول بتوع هتافات ومظاهرات يا فندم عمرهم ما يتحملوا مسؤولية. أي واحد من دول لو كسب الانتخابات تبقى مصيبة.
المهم : الشعب المصري العظيم يقدر يميز الصالح من الطالح.
المرشح : صح. تمام يا فندم.
المهم : أؤكد لك ان الانتخابات الرئاسية نزيهة.
المرشح : منتهى النزاهة يا فندم.
المهم : بعد انتهاء الانتخابات سيتم اعلان النتيجة من اللجنة العليا للانتخابات. قرارات اللجنة لا يجوز الطعن فيها.. أي شخص يشكك في نتيجة الانتخابات أو يزايد علينا احنا نعرف نقطع له لسانه.
المرشح : تمام يا فندم. كل ده جميل ورائع. أنا عارف ان شعبنا عظيم وواعي ومتأكد من ان الانتخابات هتكون نزيهة لكن يا فندم أنت سيادتك عودتنا على الصراحة.. أنا قلقان يا فندم. رئيس مصر منصب خطير ولو أي واحد من الثلاثة سواء ابو الفتوح أو حمدين أو خالد علي فاز في الانتخابات وبقى رئيس تبقى مصيبة. ما فيش ولا واحد فيهم متوازن. لو أي واحد فيهم حكم مصر أسبوع البلد راح يسقط في المجهول لا قدر الله.
المهم : ما تقلقش.
المرشح : يا ريت سيادتك تقول لي كلمة تريحني.
المهم : بأقولك ما تقلقش.
المرشح : يعني ايه يا فندم؟
المهم : انت ايه ما بتفهمش عربي؟ بأقول ما تقلقش يعني بالعربي الفصيح لا تقلق.
(يضحكان)
المرشح : خلاص. فهمت. ربنا يكرمك يا فندم ويخليك لمصر.
المهم : يالله اتفضل مع السلامة. انت عطلتني. أنا قدامي يوم طويل.
المرشح : مع ألف سلامة يا فندم..

عزيزي القارئ.. هل تعرف من هو المرشح الرئاسي ومن هو الشخص المهم.. اذا توصلت الى الاجابة الصحيحة فرجاء التفضل بارسالها عبر البريد الالكتروني وسوف تحصل باذن الله على هدية قيمة....

الديموقراطية هي الحل.

كاتب وروائي ـ مصر

Repérage des citations dans la presse libanaise
http://www.citations-explorer.com/

<FONT color=#ff0000 face=Arial>Pétition
Non au terrorisme de l’Etat d’Israël
<A href="http://www.aloufok.net/spip.php?article2">http://www.aloufok.net/spip.php?article2